غیر معمولی اعتدال پسندی
01/09/2026کیونکہ خُدا نے دنیا سے ایسی محبت رکھی
ہر مسیحی محدُود کفارے پر یقین رکھتا ہے ۔یہ بات شاید میرے آرمینین دوستوں کو مضحکہ خیز معلوم ہو ، کیونکہ ایک طویل عرصہ سے یہ سمجھا جاتا رہا ہے کہ صرف کیلون ازم کے خامی ہی لفظ “TULIP”میں موجود اِس خوفناک حرف “L” یعنی محدود کفارہ کے قائل ہیں ۔لیکن اگر یسوع مسیح کی موت کو ( محض ایک ممکنہ کفارہ کی بجائے )، ایک حقیقی کفارہ تسلیم کیا جائے تو پھر اس کے محدُود ہونے کا سوال ناگزیر ہو جاتا ہے ، سوائے اس کے کہ آپ عالمگیر نجات جیسے جھوٹ پر یقین رکھیں ۔
یہ بات اس حقیقت کے اعتراف پر مبنی ہے کہ مسیح کی موت واقعی گناہوں کا کفارہ ہے ، اور یہی حقیقت اِن شاندار آیات کی تفسیر میں ہماری رہنمائی کرتی ہے جو اُس کے نجات بخش کام کی عظیم وسعت کو بیان کرتی ہیں ۔مثال کے طور پر ، یوحنا ، مسیح یسوع کے بارے میں فرماتا ہے کہ "وہی ہمارے گناہوں کا کفارہ ہے اور نہ صرف ہمارے ہی گناہوں کا بلکہ تمام دنیا کے گناہوں کا بھی "(۱ یوحنا ۲: ۲)۔یہاں انتخاب کیلون ازم اور آرمینین ازم کے درمیان نہیں ہے ۔یہ انتخاب کیلون ازم اور عالمگیر نجات کے نظریہ کے درمیان ہے ۔اگر لفظ ” دنیا ” سے مُراد ” ہر وُہ شخص جو کبھی زندہ رہا ہے یا کبھی زندہ رہے گا ” لیا جائے ، تو پھر کفارہ کی بنیاد پر ہر ایک شخص نجات پائے گا ۔تو پھر کوئی بھی گُناہ ایسا نہیں ہوگا جس کی قیمت ادا نہ کی گئی ہو ، بشمول بے اعتقادی کے گناہ کے ۔
کوئی بھی شخص جو جہنم اور عدالت کے بارے میں بائبل کی تعلیمات کو سنجیدگی سے لیتا ہے ، وُہ کبھی بھی عالمگیر نجات کی تائید نہیں کرے گا ، اِس کا مطلب یہ ہے کہ یوحنا ، یہاں "دُنیا ” کا لفظ ہر کسی شخص کے لیے استعمال نہیں کر رہا جو کبھی زندہ رہا ہے یا زندہ رہے گا ،(جیسا کہ وُہ ہمیشہ کرتا ہے ، دیکھیں یوحنا ۱۴: ۱۹؛۱٦: ۸؛ ۱۸: ۲۰؛ ۱ یوحنا ۲: ۱۵)۔یوحنا کا مقصد یہ اعلان کرنا ہے کہ یسوع مسیح ہی واحد نجات دہندہ ہے جو دنیا کے پاس ہے ۔اُس کی موت صرف یہودیوں ، امریکیوں ، یا کسی ایک خاص گروہ کے لوگوں کو نہیں بلکہ پوری دنیا کے لوگوں میں سے اپنے لوگوں کو مخلصی بخشتی ہے ۔
کیلون ازم ایک طر ف تو عالمگیر نجات کی بدعت سے اور دوسری طرف کفارے کی حقیقی فطرت کو کمزور کرنے کی غلطی سے حفاظت کرتی ہے ۔کیلون ازم کے حامی اِس بات کو تسلیم کرتے ہیں کہ یسوع مسیح کی موت اُن سب کو یقینی طور پر نجات بخشتی ہے جن کے لیے وُہ مقرر کی گئی تھی ۔دوسرے لفظوں میں ، کفارہ اپنے دائرہ کار اور مقصد کے اعتبار سے محدود سمجھا جاتا ہے ۔جن سب کے لیے مسیح یسوع نے اپنی جان دی وُہ ضرور نجات پائیں گے ۔
تاہم ، آرمینین ازم ، اِس طرح کی غلطیوں کے خلاف موثرٴ طور پر حفاظت نہیں کر سکتی ۔ آرمینین یہ دعویٰ کرتے ہیں کہ یسوع مسیح کی موت انسانی تاریخ کے ہر ایک انسان کو نجات دینے کے لیے مقرر کی گئی تھی ، لیکن یہ حقیقت میں ہر انسان کو گُناہ سے مُبرا نہیں کرتی ۔چنانچہ ، اِس کفارے نے ہر اُس شخص کو نجات نہیں بخشی جس کے لیے یہ مقصود تھا ۔دوسرے لفظوں میں ، آرمینین نقطہ نظر ، اگرچہ یہ دعویٰ کرتا ہے کہ کفارہ اپنی وسعت میں لامحدود ہے ، لیکن وُہ اِس نتیجے پر پہنچنے پر مجبور ہو جاتا ہے کہ یہ اپنی تاثیر میں محدود ہے ۔یہ اپنے عالمگیر مقصد کو پورا کرنے میں ناکام رہا ۔
ان دونوں نظریات کے درمیان فرق ایسے ہے جیسے ایک تنگ پُل جو وادی کے ایک سِرے سے دوسرے سِرے تک مکمل طور پر پہنچتا ہے ، اور ایک وسیع پُل جو آدھے راستے تک جاتا ہے ۔اگر وُہ آپ کو دوسری طرف نہیں پہنچاتا تو اس کی وسعت سے کیا فرق پڑتا ہے ؟
اسی فرق کی بنیاد پر چارلس سپرجن نے یہ دلیل دی کہ آرمینین ازم ، کیلون ازم کے مقابلے میں ، مسیح کے کفارے کو کہیں زیادہ محدود کر دیتا ہے ۔ آرمینین کہتا ہے : ” مسیح اس لیے مُوا ہے کہ ہر انسان نجات پا سکے ، بشرطیکہ” -اورپھر نجات کی بعض شرائط سامنے آتی ہیں ۔اب کون ہے جو مسیح کی موت کو محدود کرتا ہے ؟کیوں ، تم ہی تو کرتے ہو۔آپ کہتے ہیں کہ مسیح اس لیے نہیں مُوا کہ کسی بھی شخص کی نجات کو قطعی طور پر یقینی بنا دے ۔ہم آپ سے معذرت چاہتے ہیں ، مگر جب آپ کہتے ہیں کہ ہم مسیح کی موت کو محدود کرتے ہیں ؛ تو ہمارا جواب یہ ہے ، "نہیں ، جناب ، دراصل ، آپ ہی مسیح کی موت کو محدود کرتے ہیں ۔”ہم کہتے ہیں کہ مسیح نے اس طرح جان دی کہ اُس نے ایک ایسی بڑی بھیڑ کی نجات کو قطعی طور پر یقینی بنا دیا جسے کوئی شمار نہیں کر سکتا ،جو مسیح کی موت کے وسیلہ سے وُہ نہ صرف نجات پا سکتے ہیں ، بلکہ حقیقت میں نجات یافتہ ہیں ، اور لازمی طور پر نجات پائیں گے ، اور اس بات کا کوئی امکان ہی نہیں کہ وُہ ہلاکت کے خطرے میں پڑیں بلکہ وُہ یقینی طور پر نجات یافتہ ہیں ۔آپ کو کفارے کا یہ نظریہ مُبارک ہو، آپ اِسے اپنے ہی پاس رکھیں ۔اور آپ کے اِس نظریہ کی خاطر ہم اپنے عقیدہ کو ہرگز ترک نہیں کریں گے ۔(سپرجن کا وعظ ، جلد ۴ ، صفحہ نمبر ۲۲۸)۔
تاہم ، ہمارا کفارے کے بارے میں نظریہ کیا ہے جس کا سپرجن نے اتنے پُرجوش انداز میں دفاع کیا ۔خصوصاً، یہ اِس بات کا فہم ہے کہ جب یسوع مسیح نے صلیب پر اپنا خُون بہایا تو اُس نے واقعی اُن سب کو نجات دی جنہیں وُہ نجات دینے کا ارادہ رکھتا تھا ۔ پُرانے عہد نامہ کے تحت جس طرح سردار کاہن اپنی کہانتی خدمت ادا کرتے وقت اپنے سینہ بند پر اسرائیل کے بارہ قبیلوں کے نام سجائے رکھتا تھا ، اُسی طرح نئے عہد نامہ کے تحت ہمارا سردار کاہن اپنے لوگوں کے نام اپنے دل پر کنندہ کیے ہوئے تھا ، جب اُس نے اپنے آپ کو اُن کے گناہوں کے کفارہ کے طور پر قربان کیا ۔
یوحنا کی انجیل کے دسویں باب میں ، مسیح یسوع واضح طور پر اپنی کفارہ کی موت کا مخصوص مقصد بیان کرتا ہے ۔وُہ اپنے آپ کو ” اچھا چرواہا ” کہتا ہے جو ‘بھیڑوں کے لیے اپنی جان دیتا ہے "(یوحنا ۱۰: ۱۱)۔اس کے تھوڑی ہی دیر بعد، وُہ اُن بھیڑوں کو اُن لوگوں کے طور پر بیان کرتا ہے جو اُس کے باپ کی طرف سے اُسے دئیے گئے ہیں ۔مزید برآں ، وُہ بے ایمان اسرائیلوں سے واضح طور پر فرماتے ہیں ،” تم اِس لیے یقین نہیں کرتے کہ میری بھیڑوں میں سے نہیں ہو ۔”(یوحنا ۱۰: ۲٦-۲۹)۔
یوحنا ۱۷ میں ہمارے خُداوند کی کہانتی دُعا بھی اسی طرح کی محدُود وسعت کو ظاہر کرتی ہے ۔جب وُہ اپنے لوگوں کی خاطر اپنی جان کا کفارہ دینے کے لیے تیار ہوا ، تو اُس( مسیح) نے خاص طور پر صرف اُنہی کے لیے دُعا کی ۔یہ ہی وُہ لوگ ہیں جنہیں خُدا نے اِس دنیا میں سے اُسے دیا ہے (یوحنا ۱۷: ٦)۔بالآخر ، اُس کی کہانتی شفاعت صرف اُن لوگوں تک محدُود تھی :”میں اُن کے لیے درخواست کرتا ہوں میں دُنیا کے لیے درخواست نہیں کرتا بلکہ اُن کے لیے جنہیں تو نے مجھے دیا ہے کیونکہ وُہ تیرے ہیں "(یوحنا ۱۷: ۹)۔یہ بات ناقابل تصور ہے کہ یسوع مسیح نے اُن لوگوں کے لیے دُعا نہ کی جن کے لیے وُہ عوضی قربانی کے طورپر اپنی جان قربان کرنے والے تھے ۔ وُہ لوگ جن کے لیے اُس نے دُعا کی وُہ وہی ہیں جن کے لیے اُس نے اپنی جان دی ۔
محدُود کفارہ یا مخصوص مخلصی کا عقیدہ ، مسیح یسوع کی موت میں کسی طرح کی کمی کو ظاہر نہیں کرتا ۔کیونکہ جس ہستی نے دُکھ اُٹھایا وُہ ہستی وُہ خود ہے ، اِس لیے یسوع مسیح کی موت لامحدُود قدر و قیمت کی حامل ہے ۔کننز آف ڈورٹ اس حقیقت کو ثابت کرنے کے لیے بڑی وضاحت سے بیان کرتے ہیں کہ ،”اِبن آدم کی موت ، پوری دُنیا کے گُناہوں کے کفارہ کے لیے کافی اور لامحدُود قدر و قیمت کی حامل ہے "(۲۔۳)۔
کفارے کی محدُودیت ، خُدا کے اُس اِرادہ اور مقصد سے صادر ہوتی ہے جس کے تحت اُس نے یسوع مسیح کو صلیب پر بھیجا ۔مسیح کا یہ نجات بخش کام اُس کے اپنے لوگوں کے مخصوص کفارے کے لیے تھا ، اُن کے کفارے کے لیے جنہیں خُدا نے اُسے دیا تھا ۔اُس کی موت کا برگزیدوں کو بچانا تھا ۔
مسیح یسوع یہ تعلیم دیتے ہیں کہ اُن کی پوری نجات بخش خدمت ، خُدا کے مقرر کردہ ازلی مقصد کی تکمیل میں انجام دی گئی تھی ۔یوحنا ٦: ۳۸-۳۹ ، میں اِس سے یہی مُراد ہے :
کیونکہ میں آسمان سے اِس لیے نہیں اُترا ہوں کہ اپنی مرضی کے موافق عمل کروں بلکہ اِس لیے کہ اپنے بھیجنے والے کی مرضی کے موافق عمل کروں ۔ اور میرے بھیجنے والے کی مرضی یہ ہے کہ جو کچھ اُس نے مجھے دیا ہے میں اُس میں سے کچھ کھو نہ دُوں بلکہ اُسے آخری دن پھر زندہ کرُوں ۔
علمِ الہیات کے ماہرین اِس انتظام کو فدیہ کا عہد کہتے ہیں جس میں بنائے عالم سے پیشتر ہی ، باپ ، بیٹے اور رُوح القُدس نے برگشتہ انسانوں کو نجات دینے کا عہد کیا ۔صرف رحم اور فضل کی بدولت ہی خُدا نے بعض انسانوں کو نجات کے لیے چُن لیا (رومیوں ۹: ۱۱-۱۳؛ افسیوں ۱: ۴؛ ۲ تھسلنیکیوں ۲: ۱۳)۔ اِن برگزیدوں کو خُدا نے اپنے بیٹے کے سپُرد کیا (یوحنا ٦: ۳۷، ۳۹؛ ۱۷: ٦، ۹، ۲۴) ، جس نے اپنی تجسیم اور نجات بخش مقصد کے تحت نجات کے اس کام کو پورا کرنے کا ارادہ کیا (مرقس ۱۰: ۴۵؛ یوحنا ۱۰: ۱۱)۔اِس الٰہی منصوبے کے تحت ، باپ اور بیٹے کی طرف سے رُوح القُد س کو دنیا میں بھیجا گیا (یوحنا ۱۵: ۲٦؛ ۱٦: ۵-۱۵)، تاکہ مسیح کے کام کو اُن لوگوں پر نافذ کرے جنہیں خُدا نے اپنے بیٹے کو دے دیا اور جن کے لیے بیٹے نے اپنی جان قربان کی ۔
کفارے کا یہ نظریہ ، بشارت کی کامیابی کی ضمانت دیتا ہے ۔ خُدا کے ایسے لوگ موجود ہیں جو انجیل مقدس کی مُنادی کے وسیلہ سے یقینی طور پر نجات پائیں گے ۔ اُس نے اُن کو چُن لیا ہے ۔مسیح یسوع نے اُن کے لیے اپنی جان دی ہے ۔اور رُوح القُدس انہیں ، نجات کے پیغام کے وسیلہ سے نئے سِرے سے پیدا کرے گا ۔اِسی سچائی نے ، کرنتھس میں حوصلہ شِکنی کے باوجود پولُس رسول کو ثابت قدم رکھا (اعمال ۱۸: ۹-۱۰)، اور یہی سچائی آج ہماری بشارتی کوششوں میں ، نہ صرف مقامی سطح پر بلکہ عالمی سطح پر بھی ہمیں ثابت قدم رکھے گی (مکاشفہ ۵: ۹)۔
یہ مضمون سب سے پہلے لیگنئیر منسٹریز کے بلاگ میں شائع ہو چکا ہے۔
