کیونکہ خُدا نے دنیا سے ایسی محبت رکھی
03/09/2026
مسیح یسوع کب مُوا ؟
17/09/2026محبت کی خصوصیات
سترھویں صدی کے اوائل میں ، آئر لینڈ کے آرچ بشپ اُشر نے ایک پریسبیٹرین خُدا کے خادم کے گھر جانے کا ارادہ کیا تاکہ معلوم کر سکے کہ اُس شخص کی ذاتی دینداری کے بارے میں جو کچھ اُس نے سُنا ہے کیا وُہ سچ ہے یا نہیں ۔ اُشر ایک غریب بھکاری کا بھیس بدل کر اُس پاسبان کے گھر پہنچا ۔اُس کا گھر کے اندر خیر مقدم کیا گیا ، جہاں پر اُس کی بیوی اہل خانہ کو کیٹکیزم کی تعلیم دے رہی تھی ۔اُس نے غیر متوقع /بن بلائے مہمان سے دریافت کیا کہ خُدا کے کتنے احکا م ہیں ؟جب اُس نے جواب دیا ،” گیارہ” تو اُس عورت نے اُسے نہایت جاہل انسان تصور کرتے ہوئے اُس سے مزید سوال نہ پوچھا ، بلکہ اُسے کھانا کھلایا اور سونے کے لیے جگہ دے دی ۔
اُسی رات بعد میں جب اُس پاسبان کو اُشر کی حقیقت معلوم ہوئی تو اُس نے اُن سے اگلی صبح مُنادی کرنے کی درخواست کی ۔پس ، اُشر نے خود کو اس طرح سے سنوارتے ہوئے صاف سُتھرا لباس زیب تن کیا کہ پاسبان کی بیوی نے اُسے نہ پہچانا ، اور وُہ منبر پر جلوہ افروز ہوا ۔ اُس نے اِس موضوع پر مُنادی کی جسے اُس کے خیال میں” گیارھواں حکم” کہا جا سکتا ہے ،”یوحنا ۱۳: ۳۴):”میں تمہیں ایک نیا حکم دیتا ہوں کہ ایک دوسرے سے محبت رکھو "۔پاسبان کی بیوی حیران رہ گئی کہ وُہ بھکاری ایک واعظ نکلا ، اور یہ کہ اُس نے اُس کے بارے میں نہایت غلط رائے قائم کی تھی اور اُس سے زیادہ اچھا برتاوٴ نہ کیا تھا ۔
محبت کیا ہے ؟اور آپ کیسے یہ جان سکتے ہیں کہ آپ مسیح کے اِس حکم ،کہ اپنے مسیحی بہن بھائیوں سے محبت رکھو کو پورا کر رہے ہیں یا نہیں ؟ ایک محبت رکھنے والا شخص دوسروں کے ساتھ کیسا برتاوٴ کرتا ہے ؟مقبول ذرائع ابلاغ اکثر محبت کو ایک کشش اور خوشی کے جذبات کے طور پر پیش کرتے ہیں ، لیکن ایسے جذبات تھرمامیٹر کے پارے کی طرح اُوپر نیچے ہوتے رہتے ہیں ۔ہمیں ایسی محبت کی ضرورت ہے جو تھرمامیٹر کی مانند نہیں بلکہ تھرموسٹیٹ کی مانند ہو ، یعنی جو ہمارے رَدعمل کو قابو میں رکھے نہ کہ خود اُن کے قابو میں آ جائے ۔
دیگر لوگ محبت کو ایسی غیر جانبدار اور غیر مشروط قبولیت کے طور پر پیش کرتے ہیں ، جو کہ غیر مشروط مثبت عزت و احترام کے نفسیاتی تصور سے ماخو ذ ہے ۔لیکن یہ حد سے زیادہ سادہ طرزِ فکر اُلجھن پیدا کرتا ہے اور ہمیں بد خواہی اور بدی کے سامنے بے بس چھوڑ دیتی ہے ۔آپ ایک دہشت گرد اور مسلسل قتل کرنے والے شخص کو غیر مشروط طور پر اور بغیر کسی ملامت کے کیسے قبول کر سکتے ہیں ؟
آج بہت سے مسیحی یہ سمجھتے ہیں کہ نئے عہد نامہ میں محبت کے لیے استعمال ہونے والے کلیدی یونانی الفاظ ، یعنی’’ اگاپے‘‘اور اِس سے ماخوذ فعل’’ اگاپاوٴ ‘‘ کسی جذباتی احساس کو ظاہر نہیں کرتے بلکہ یہ ایک ایسی ارادی خواہش اور عمل کو بیان کرتے ہیں جس میں انسان اپنے نقصان کی پرواہ کیے بغیر دوسروں کی بھلائی کرتا ہے ۔لیکن یہ خیال یونانی زبان میں محبت کے مختلف الفاظ کی بنیاد پر قائم نہیں کیا جا سکتا ، کیونکہ اگاپے سے متعلق الفاظ کا گروہ مختلف سیاق و سباق میں ہر طرح کے معانی اختیار کر سکتا ہے ۔مزید یہ کہ محبت کا ایک ایسا تصور جو جذبات سے خالی ہو ہمیں اس بارے میں غیر یقینی میں مبتلا کر دیتا ہے کہ ہم اپنے احساسات کے ساتھ کیا کریں ۔یہ تصور اُن گہرے اور اکثر پوشیدہ محرکات سے بھی درست طور پر نمٹنے میں ناکام رہتا ہے جو ہمارے انتخاب کی بنیاد بنتے ہیں ۔
پس محبت کا درست بیان ہمیں کہاں پر ملتا ہے ؟ پولُس رسول نے ۱ کرنتھیوں ۱۳: ۴-۷ آیات میں اِسے بڑے شاندار انداز میں بیان کیا ہے ۔پولُس رسول محبت کی تعریف بیان کرتا ہے :اور لاطینی لفظ کریٹس(Caritas) سے ماخوذ لفظ چیریٹی (Charity) یعنی خیرات کو ایک افضل ذریعہ قرار دیتا ہے (۱ کرنتھیوں ۱۲: ۳۱)،جو کہ باب ۱۲ میں مذکور رُوحانی نعمتوں سے بھی برتر ہے ، اور خُدا کے میزان میں پرکھے جانے(۱ کرنتھیوں ۱۳: ۱-۳) پر ہر اُس زندگی کے لیے بالکل ضروری ہے جو کسی حقیقی قدروقیمت کی حامل ہو۔ ۴ -۷ آیات محبت کی صفات اور اس کے اعمال کی خوبصورتی کو ظاہر کرتی ہیں ۔یہ دراصل محبت کی ماہیت کی کوئی جامع تعریف نہیں بلکہ اس کے ثمرات کی ایک وضاحت ہے ؛ یہ آیات ہمیں دکھاتی ہیں کہ محبت کس طرح بعض اعمال اور رویوں کو جنم دیتی ہے اور بعض دوسرے اعمال اور رویوں کی مخالفت کرتی ہے ۔
اِن آیات کا آغاز تحمل اور اختتام برداشت پر ہوتا ہے (آیات ۴، ۷)۔ محبت آزمائشوں ،مصیبتوں اور بدی کے مقابلے میں اپنے رَدعمل کے وسیلہ سے اپنے حقیقی رنگ کو ظاہر کرتی ہے ۔محبت کا سب سے بڑا اظہار مسیح یسوع کی مصلوبیت میں ظاہر ہوتا ہے ۔پولُس رسول رومیوں ۵: ۸ ، میں بیان کرتا ہے ،”لیکن خُدا اپنی محبت کی خُوبی ہم پر یوں ظاہر کرتا ہے کہ جب ہم گنہگار ہی تھے تو مسیح ہماری خاطر مُوا”۔ پولُس جس نے کہا کہ وُہ ” مسیح یسوع بلکہ مسیح ِ مصلوب” کے سوا کچھ نہیں جانتا (۱ کرنتھیوں ۲: ۲)، اُس نے یقیناً مسیح کی محبت پر غور و فکر کیا تھا ۔یوحنا اُس محبت کو جو مسیح یسوع کی ہمارے لیے جان دینے کی رضا مندی کی بنیاد تھی ، یوں واضح کرتا ہے جب وُہ فرماتا ہے کہ ،”اِس سے زیادہ محبت کوئی شخص نہیں کرتا کہ اپنی جان اپنے دوستوں کے لیے دے دے "(یوحنا ۱۵: ۱۳)۔
محبت اپنی فضیلت کو مختلف صورتوں میں آشکار کرتی ہے ۔جوناتھن ایڈورڈ نے لکھا،”محبت ایک متحرک اصول ہے "(ورکس ۸: ۳۰۱)۔مثبت طور پر ، محبت صبر سے کام لیتی ہے اور مہربانی ظاہر کرتی ہے (۱ کرنتھیوں ۱۳: ۴)۔محبت اچھے اعمال کو جاری رکھتی ہے ۔دوسروں کی ضروریات کو پورا کرنے اور خُدا کے نام کو جلال دینے کے لیے ، ایک محبت کرنے والا شخص ناگوار حالات یا مشکلات کے باوجود بھی ثابت قدمی سے خدمت کرتا ہے ۔محبت تکلیف کا بدلہ مہربانی سے دینے کا ارادہ رکھتی ہے اور بدی کے عوض بھلائی کرتی ہے ۔مسیحی محبت خُدا کی صورت و شبیہ کو منعکس کرتی ہے ، اُس خُدا کی جو ،” مہربان ، رحیم ، قہر کرنے میں دھیما اور شفقت اور وفا میں غنی ہے "( خروج ۳۴: ٦)۔
منفی پہلو سے دیکھیں ، محبت حسد نہیں کرتی (۱ کرنتھیوں ۱۳: ۴)۔محبت خود غرضانہ حسد کو روکتی ہے ، کیونکہ اِس نے اپنے نفس کا انکار کرنا سیکھ لیاہے اور یہ دوسروں کی خوشخالی میں خوش ہوتی ہے ۔یہ فخر نہیں کرتی اور پھولتی نہیں (آیت ۴)۔یہ اوصاف ظاہر کرتے ہیں کہ محبت فروتنی کی ایک صفت ہے ۔محبت ،خُدا اور دوسروں لوگوں کے بارے میں فکر مندی پیدا کرتی ہے اور اپنے بارے میں حد سے زیادہ فکر کو کم کرتی ہے ۔جوناتھن ایڈورڈ نے لکھا کہ ،”ہر وُہ شخص جو خُدا سے محبت کرتا ہے ، اُس سے خُدا ہونے کے ناطے محبت کرتا ہے ،اگر ہم خُدا سے اُس کی لا محدُود برتری کے باعث محبت کرتے ہیں ، تو ہم جو لامحدود طور پر اُس سے کم تر ہیں ، ہمارے اند ر ایک ایسی محبت عمل کرتی ہے جو ایک فروتن محبت ہے ۔”(ورکس ۸: ۲۴۵)۔
محبت ناشا ئستگی سے پیش نہیں آتی (۱ کرنتھیوں ۱۳: ۵)۔یونانی فعل جس کا ترجمہ (ناشائستگی سے پیش آنا ) کیا گیا ہے ، اُس کا مطلب ہے اخلاقی اصولوں کی خلاف ورزی کرتے ہوئے ایسا عمل کرنا جو رسوائی کا باعث بنے ۔محبت انسان کو ترغیب دیتی ہے کہ وُہ خُدا اور انسانو ں کے سامنے وہی کرے جو عزت کے لائق ہے (رومیوں ۱۲: ۷؛ ۲ کرنتھیوں ۸: ۲۱)۔یہ بیان محبت کے بارے میں ہر اُس نظریے کو رَد کرتا ہے جو شریعت کے خلاف ہو ؛ محبت خُدا کی شریعت سے محبت رکھتی ہے (زبور ۱۱۹: ۹۷) اور اسے پورا کرنے کی کوشش کرتی ہے (رومیوں ۱۳: ۸-۱۰)۔
محبت ذاتی ترقی نہیں چاہتی (۱ کرنتھیوں ۱۳: ۵)، بلکہ یہ ہمیں خُدا کے جلال اور اپنے پڑوسی کی بھلائی کے طالب ہونے پر اُبھارتی ہے ۔محبت ہمیں خادم بننے کی ترغیب دیتی ہے (فلپیوں ۲)۔محبت تنک مزاج نہیں ہوتی اور نہ ہی بدی کا حساب رکھتی ہے (آیت ۵) ۔ تنک مزاج ہونا یہ ہے کہ انسان آسانی سے غصہ میں بھڑک اُٹھے (اعمال ۱۷: ٦)۔لیکن محبت اپنے جذبات پر قابو رکھتی ہے ۔گناہوں کو معاف کرنا یہ ہے کہ اُن کا حساب نہ رکھا جائے ،محبت لوگوں کے گناہوں کا حساب رکھنے سے خوش نہیں ہوتی ( رومیوں ۴: ۲؛ ۲ کرنتھیوں ۵: ۱۹)۔
محبت بدکاری سے خوش نہیں ہوتی بلکہ راستی سے خوش ہوتی ہے (۱ کرنتھیوں ۱۳: ٦)۔جب بھی محبت راستبازی کو دیکھتی ہے تو شادمان ہوتی ہے ۔لیکن جب کسی کے گُناہ میں گِرنے اور اُس کی بھاری قیمت چُکانے کی خبر ملتی ہے تو محبت غمگین ہوتی ہے ؛ اِس لیے محبت ایسی خبروں کو غیبت کے لذیذ لُقمے کے طور پر نہیں لیتی ۔ایسی محبت دشمنوں تک کے ساتھ بھلائی کرتی ہے ۔
آیت ٦ اس نسبتی رواداری کے بُت کی ملامت کرتی ہے جسے ہمارے معاشرے میں اکثر محبت کا نام دیا جاتا ہے ؛ کیونکہ سچی محبت بدی سے عداوت بھی رکھتی ہے (رومیوں ۱۲: ۹)۔خُدا کی محبت کا سب سے عظیم اظہار ، اُس کی راستبازی کا بھی سب سے عظیم اظہار تھا ، کیونکہ اُس کے بیٹے نے ہمارے گُناہوں کی سزا اپنے اوپر لے کر خُدا کے انصاف کو پورا کیا (رومیوں ۳: ۲۵-۲٦)۔لہٰذا ، ۱ کرنتھیوں ۱۳: ٦ ، اِس عام مسیحی تصور کی اصلاح کرتی ہے کہ محبت کا احساسات سے کوئی تعلق نہیں ۔محبت گُناہ کے خلاف اور راستبازی کے حق میں گہرے جذبات رکھتی ہے ۔
محبت کے ساتھ منسوب آخری چار اعمال یا عادات (آیت نمبر ۷) میں بار بار آنے والے لفظ "سب” کو مطلق یا غیر مشروط آفاقیت کے معنوں میں نہیں پڑھنا چاہیے ۔اِن آیات کو نئے عہد نامہ کے سیاق و سباق میں پڑھنا ضروری ہے ۔جب پولُس رسول سب کا لفظ استعمال کرتا ہے تو اُس کا مطلب یہ ہے کہ محبت اُن تمام بوجھوں کو اُٹھاتی ہے جنہیں اپنی صلیب کے طور پر اُٹھا نا ضروری ہے ،اُن تمام باتوں پر ایمان رکھتی ہے جن پر بطور مسیحی ہمیں ایمان لانا چاہیے ،اُن تمام چیزوں کی اُمید رکھتی ہے جن کا خُدا نے وعدہ کیا ہے ،اور مسیح کی خاطر اُن تمام آزمائشوں کو برداشت کرتی ہے جن سے ہمیں گزرنا پڑتا ہے ۔پس ، محبت ان چاروں اعمال کو مستقل طور پر عمل میں لاتی ہے ۔
محبت میں مشکلات کے درمیان ثابت قدم رہنے کی قوت ہوتی ہے ، اور محبت ہر طرح کے حالات میں ایمان اور اُمید رکھتی ہے ۔ایمان ، اُمید اور محبت کی یہ ثلاثی(Triad) پاک کلام میں بار بار ظاہر ہوتی ہے ۔چونکہ مسیحی، خُدا سے محبت رکھتے ہیں ، اِس لیے اُن کے دل اُن کے لیے خُدا کی وفادار محبت میں خوش ہوتے ہیں ، جو اُن کے ایمان کو مضبوط اور اُن کی اُمید کو زندہ رکھتی ہے ۔ایڈورڈ نے کہا کہ ،”محبت ، عملی ایمان کی جان اور رُوح ہے” ، جو ایمان کو زندگی اور ثمر آوری بخشتی ہے (ورکس ۱۸: ۱۳۹؛ ۳۳۰-۳۳۱)۔محبت ” ایمان اور اُمید کا نہایت ضروری جُزو ہے "(۸: ۳۲۷)۔
یہاں ہم گُناہ اور مُصیبت سے بھر پور دنیا میں محبت کی مستقل سرگرمی کے متعلق پولُس رسول کا بیان دیکھتے ہیں۔محبت ایک عمل ہے ۔لٰہذا ، محبت کو ظاہری کاموں سے بڑھ کر ہونا چاہیے ؛ اِس کا اصل جوہر دل کے محرکات میں پایا جاتا ہے ۔کونسی چیز محبت کو تحریک دیتی ہے ؟ یہ کوئی خود غرضانہ خواہش نہیں ہو سکتی ،کیونکہ محبت مغرور نہیں ہوتی اور اپنا فائدہ نہیں چاہتی ۔نہ ہی محبت کسی محبوب شخص سے فوری لذت حاصل کرنے کی خواہش سے چلتی ہے ،ورنہ محبت برگشتہ لوگوں کے ساتھ صابر اور مہربان نہ ہوتی ۔
تو پھر کونسی چیز محبت کو تحریک دیتی ہے ؟ متن ہمیں دو اشارے دیتا ہے ۔اِس کی خوشی سچائی میں ہے یعنی خُدا کی راستبازی اور وفاداری میں ۔لٰہذا ، محبت اُس محبت میں خوش ہوتی ہے جو خُدا نے مسیح میں ظاہر کی ہے ۔”ہم اِس لیے محبت رکھتے ہیں کہ پہلے اُس نے ہم سے محبت رکھی "(ا یوحنا ۴: ۱۹)۔اِس کی ثابت قدمی ایمان اور اُمید کے ساتھ گہرے طور پر مربوط ہے ، یعنی ہر بات میں مسیح کی طرف دیکھنے اور خُدا پر بھروسا رکھنے میں ہے ۔ایڈورڈ نے کہا کہ محبت خُدا کی ” عظمت اور برتری کے ادراک اور احساس ” سے جنم لیتی ہے (تصنیفات ۸: ۳۳۳)۔ لہٰذا، ہم یہ نتیجہ اخذ کرتے ہیں کہ محبت خُدا کی ذات سے صادر ہوتی ہے ، خُدا مرکوز ہوتی ہے ، اور خُدا ہی سے قوت حاصل کرتی ہے ۔”خُدا محبت ہے "(۱ یوحنا ۴: ۸)۔ہم خُدا کے ساتھ اُس وقت سے زیادہ گہری رفاقت میں کبھی نہیں ہوتے جب ہم حقیقی محبت میں چلتے ہیں ۔پس ، محبت کی خصوصیات اور محبت کے اعمال کس قدر خوب صورت ہیں ۔
یہ مضمون سب سے پہلے لیگنئیر منسٹریز کے بلاگ میں شائع ہو چکا ہے۔
