غیر  معمولی    اعتدال  پسندی  

اپنی  کتاب  "قدرو  منزلت  کی  طلب”  (The Hunger for Significance)  میں  مَیں  نے  اُس  خواہش  کا  جائزہ  لیا  جو  عام  طور  پر  ہم  سب  میں  پائی  جاتی  ہے  کہ  اپنی  زندگیوں  میں  عزت،  قدر  اور  اہمیت  کی  کوئی  بنیاد  تلاش  کریں۔اُس  وقت  مَیں  نے  لکھا  تھا  :”  جدید  انسان  کی  زندگی  میں  ایک  دردناک  خلا  موجود  ہے  ۔جو  خالی  پن  ہم  اپنے  اندر  محسوس  کرتے  ہیں  وُہ  نہ  تو  کسی  گاڑی  سے  ،  نہ  بہتر  ملازمت  سے  ،  اور  نہ  ہی    بڑے  گھر  سے  دُور  ہو  سکتا  ہے  "۔  یہ  صرف  اُس  وقت  بھر  سکتا  ہے  جب  انسان  یہ  سمجھے  کہ  ہر  انسانی  زندگی  اہمیت  رکھتی  ہے  ۔ہماری  زندگیاں  بے  معنی  نہیں  ہو  سکتیں  ۔”

آج  کے  دَور  میں  قدرو  منزلت  اور  انسانی  وقار  کی  جستجو  اکثر  اُس  ہمہ  گیر  نااُمیدی  سے  اُبھرتی  ہے    جو  اُس  عالمی  ثقافت  میں  سرایت  کر  چکی  ہے  جس  میں  ہم  زندگی  بسر  کر  رہے  ہیں  ۔ہمیں  بار  بار  بتایا  جاتا  ہے  کہ  ہم  محض  کائناتی  حادثات  ہیں  جو  اتفاقاً  کیچڑ  سے  نمودار  ہوئے  ہیں  ۔  ہماری  ابتدا  بے  مقصد  ہے،اور  ہماری  قسمت  میں  فنا  ہو  جانا  لکھا  ہے  ۔تاہم  ،  نااُمیدی  کی  اِن  دو  انتہاوٴں  کے  درمیان  ،  قدرو  منزلت  اور  انسانی  وقار  کی  جُستجواکثر  ایک  شدید  اضطراب  کے  احساس  کے  ساتھ  جاری  رہتی  ہے  "

گفتگو    کے  اِس  حصے  میں  ،  ہمارا  موضوع  بحث  سرفرازی  و  کمال  کی  وُہ  تلاش  ہے  ،جو  گہرے  طور  پر  قدرو  منزلت  کی  ہماری  اُس  فطری  تمنا  سے  جڑی  ہے  جو  انسانی  رُوح  کا  خاصہ  ہے  ۔قدرو  منزلت  حاصل  کرنے  کی  جُستجو  کے  پیچھے  مختلف  ،  اور  بعض  اوقات  ایک  دوسرے  سے  متصادم  محرکات  اور  مقاصد  کارفرما  ہو  سکتے  ہیں  ۔یہ  جُستجو  محض  اُس  خواہش  پر  مبنی  ہو  سکتی  ہے  کہ  ہم  اُس  کام  میں  جس  میں  ہم  مشغول  ہیں  ،  دوسروں  سے  بڑھ  کر  کامیابی  حاصل  کریں  ۔ایک  طرف  تو  ،  اِس  طرح  کی  برتری  حاصل  کرنے  کا  محرک  دوسروں  پر  سبقت  حاصل  کرنے  کی  مسابقتی    خواہش  ہو  سکتا  ہے  ۔تاریخی  طور  پر  ،  ہم  نے  اپنی  انسانیت  کی  پہچان  ،”ہومو  سیپینز”  یعنی  دانا  انسان  کی  اصطلاح  سے  کی  ہے  ۔فریڈرک  نطشے(Nietzsche)  ،  جو  انیسویں  صد  ی  کا  ایک  نیستیت  پسند  فلسفی  تھا  ،  یہ  دعویٰ  کرتا  تھا  کہ  انسانی  وجود  کی  سب  سے  بڑی  پہچان  ہماری  دانش  مندی  (سیپیئنز  )نہیں،  بلکہ  اقتدار  حاصل  کرنے  کی  خواہش  اور  فتح  و  غلبہ  پانے  کا  تمنا  ہے  ۔اقتدار  کی  وُہ  ہوس  جو  ظالم  حکمرانوں  اور  آمروں  کو  تحریک  دیتی  ہے  ،  ایسی  چیز  ہے  جسے  عمومی  طور  پر  ہم  بَدی  سمجھتے  ہیں  ،  لیکن  نطشےاِسے  ایک  قابل  ِ  تعریف  وصف  قرار  دیتا  ہے۔اُس  کے  نزدیک  وُہ  شخص  مافوق  الفطرت  ہے  جو  سب  سے  بڑھ  کر  فاتح  ہو  ۔وُہ  ایسا  شخص  ہے  جو  اپنی  فطری  اقتدار  کی  خواہش  کو  نہ  صرف  بے  لگام  چھوڑ  دیتا  ہے  ،  بلکہ  ہر  ممکن  ذریعے  سے  اس  نفسانی  ہوس  کو    پروان  چڑھاتا    اور  تقویت  دیتا  ہے  ۔اس  دنیا  میں  جس   میں  ہم  رہتے  ہیں  وہاں  اقتدار  کی  خواہش  کو  اکثر  اس  آرزو  کے  طور  پر  دیکھا  جاتاہے  کہ  انسان  دنیاوی    ترقی  کی  سیڑھیاں  چڑھتے  ہوئے  اختیار  اور  طاقت  کے  اعلیٰ  مقام    تک  پہنچ  جائے  ،  تاکہ  وُہ  دوسروں  پر  غلبہ  حاصل  کر  سکے  اور  اُن  پر  اپنی  حکمرانی  قائم  کر  سکے۔اس  لحاظ  سے  ،  غلبہ  پانے  کی  وُہ  مسابقتی  خواہش  جس  کے  ذریعے  ہم  کمزور  لوگوں  پر  اپنی  حاکمیت  اورا  قتدار  قائم  کرتے  ہیں  ،وُہ  انسان  کی  اصل  فطرت  کا  اظہار  نہیں  ،  بلکہ  یہ  انسان  کی  فطری  گِراوٹ    کا  اظہار  ہے  ۔یہ  اُس  گہری  بد  عنوانی  کا  اظہار  ہے  جو  ہم  میں  سے  ہر  ایک  کے  دل  کی  تہوں  میں  چھُپی  ہوئی  ہے  ۔

اِس  کے  برعکس،  برتری  حاصل  کرنے  کی  شدید  خواہش  بعض  اوقات  اُن  مقاصد  تک  پہنچنے  کی  کوشش  سے  پیدا  ہوتی  ہے  جو  کامیابی  اور  مقصد  کے  حصول  سے  متعلق  ہوتے  ہیں  ۔قدرومنزلت  حاصل  کرنے  کی  موروثی  خواہش  جو  کہ  ہر  انسان  میں  فطری  طور  پر  پائی  جاتی  ہے  بذات  خود  کوئی  گُناہ  آلودہ  اشتہا  نہیں  ۔میرا  ایمان  ہے  کہ  قدرومنزلت  حاصل  کرنے  کی  خواہش  ہمیں    ہمارے  خالق    کی  طرف  سے  عطا  کی  گئی  ہے  ۔اُس  کی  صورت  و  شبیہ  پر  تخلیق  کی  جانے  والی    مخلوق  ہونے  کے  ناطے    ہم  جانتے  ہیں  کہ  یہ  عظمت  داخلی  نہیں  بلکہ  خارجی  ہے  ۔یعنی  یہ  وُہ  عزت  ہے  جو  خُدا  نے  ہمیں  عطا  کی  ہے  ۔ہم  قدرو  منزلت  کے  لائق  ہیں  کیونکہ  خُدا  ہمیں  بیش  قیمت  ٹھہراتا  ہے  ۔یہ  خُدا  ہی  ہے  جو  ہمیں  کمال  اور  کامیابی  کے  اُس  اعلیٰ  مقام  تک  پہنچنے  کے  لیے  بُلاتا  ہے  جس  کی  ہم  استعداد  رکھتے  ہیں  ۔اُس  کی  طرف  سے  ہی  ہمیں  وُہ  نعمتیں  عطا  کی  جاتی  ہیں  جنہیں  ہم    اِس  دنیا  میں  استعمال  کرتے  ہیں  ۔اُن  نعمتوں  کا  دیا  نتداری  سے  استعمال  ہی  وُہ  سبب  ہونا  چاہیے  جو  ہماری  برتری  حاصل  کرنے  کی  خواہش  کو  اُبھارے  ۔پس  ،  قدرومنزلت  حاصل  کرنے  کی  خواہش  بذات  خود  کوئی  بُری  بات  نہیں  ،  لیکن  بلاشُبہ    ،  ایسی  نیک  تمنائیں  جو  انسانی  دل  میں  دھڑکتی  ہیں  ،  بے  لگام  ہو  کر  تباہی  کا  سبب  بن  سکتی    ہیں  ۔قدر  و  منزلت  حاصل  کرنے  کی  خواہش  ،اگر  اسے  دیندارانہ  اخلاقی  ضوابط  کے  ذریعے  سے  قابو  میں  نہ  رکھا  جائے  تو  وُہ  آسانی  سے  نطشے    کے  بیان  کردہ  اقتدار  کی  خواہش  میں  تبدیل  ہو  سکتی  ہے  ۔

برتری  اور  فضیلت  حاصل  کرنے  کا  جائز  اور  درست  مقصد  یہ  ہے  کہ  انسان  ہر  کامیابی  کی  جستجو  ،  خُدا  کے  نام  کو  جلا ل  دینے  کے  لیے  کرے  ۔یہی  وُہ  بنیادی  مقصد  ہے  جس  کے  لیے  ہمیں  تخلیق  کیا  گیا  ہے  ،  کہ  اُس  کے  جلال  کے  گواہ  ٹھہریں  ۔ایک  چیز  جو  خُدا  کے  نام  کو  جلا  ل  نہیں  دیتی  ،وُہ  انسان  کی  اعتدال  پسندی  کی  عادت  ،  اور  موجودہ  زبُوں  حالی  پر  خود  پسندانہ  اطمینان  ہے  ۔  اِس  کے  برعکس  ،  کلام  مقدس  ہمیں  اعلیٰ  بُلاہٹ  کی  جُستجو  کی  طرف  مائل  کرتا  ہے،  وُہ  اعلیٰ  بلاہٹ  جو  مسیح  یسوع  میں  ہمیں  عطا  ہوئی  ہے  ۔اگر  ہم  کاہلی  اور  سُستی  کا  شکار  رہیں  تو  ایسی  بُلاہٹ  حاصل  نہیں  کی  جا  سکتی  ۔سُستی  اور  کاہلی  دو  ایسی  بُرائیاں  ہیں  جن  کی  کلام  مقدس    واضح  طور  پر    مذمت  کرتا  ہے    ۔برتری  حاصل  نہ  کر  پانے  کی  سب  سے  بڑی  وجہ  یہ  ہے  کہ  ہم  اتنی  محنت  کرنے  کے  لیے  تیار  نہیں  ہوتے  جتنی  برتری  کے  حصول  کے  لیے  درکا  ر  ہے  ۔کوئی  بھی  شخص  کسی  قابل  قدر  کام  میں  مستعد  اور  منظم  محنت  کے  بغیر  برتری  حاصل  نہیں  کرتا  ۔اِس  لحاظ  سے  سُستی  کامیابی  کی  دشمنی  ہے  ۔اِس  کے  برعکس  ،حتیٰ  کہ  سب  سے  زیادہ  پاکیزہ  دل  رکھنے  والے  شخص  میں  بھی  برتری  کی  جُستجو  اکثر  غرورکے  بگڑے  ہوئے  احساس  سے  آلودہ  رہتی  ہے  ۔اگر  ہمیں  اِس  دنیا  میں  ممکنہ  طور  پر  بلند  ترین  مقاصد  حاصل  کرلیں  ،  اور  بے  مثال  انداز  میں    انسانی  کامیابی  کی  بلندیوں  تک  پہنچ  جائیں    ،  تب  بھی  ہم  ایسے  خادم  ہوں  گے  جو  کسی  بات  پر  فخر  کرنے  کا  حق  نہیں  رکھتے  ،  سوائے  خُدا  کے  جلا  ل  اور  اُس  قیمتی  مخلصی  کے  جو  ہمیں  مسیح  یسوع  میں  حاصل  ہے  ۔

پس  آوٴ  ،  ہم  برتری  کے  طالب  ہو  ں  ،  ہم  اپنے  آپ  کو  برداشت    کی  آخری  حد  تک  لے  جائیں  تاکہ  ہر  کام  میں  ممکنہ  بُلند  ترین  معیار  حاصل  کر  سکیں  ،  اور  ساتھ  ہی  ہمیشہ  چوکس  رہیں  کہ  غرور  کا  گُناہ  آلُود  جذبہ  ہماری  محنت  کی  قدر  کو  خراب  نہ  کر  دے  ۔آوٴ  ہم  جانفشانی  سے  محنت  کریں  ،  آوٴ  ،خُدا  کے  جلال  کے  لیے  برتری  حاصل  کریں  ۔جلال  صرف  خُدا  ہی  کی  ذات  کو  حاصل  ہے  ۔

یہ مضمون سب سے پہلے لیگنئیر منسٹریز کے بلاگ میں شائع ہو چکا ہے۔