مسیحی  علم  النجات  کو  درپیش  عَصری  چیلنجز

سِنڈ  آف  ڈورٹ  نے  ڈچ  اِصلاحی  کلیسیاوٴں  کے  اندر  آرمینین  تنازعہ  کو  باضابطہ  طور  پر  طے  کر  دیا  ،  لیکن  آرمینین  ازم  خود    ختم  نہ  ہوئی  ،  اور  نہ  ہی  اس  نے  مسیحی  علم  النجات  کے  لیے  چیلنجز  پیدا  کرنا  بند  کیا  ۔اور  یہ  آج  کے  دن  تک  ایسا  کرنا  جاری  رکھے  ہوئے  ہے  ۔تاہم  ،  صرف  آرمینین  ازم  ہی  عصر  حاضر  کا  اہم  مسئلہ  نہیں  ہے  ۔اِس  تحریر  میں  ہم  مختصراً  مسیحی  علم  النجات  کو  درپیش  مزید  پانچ  عصری  چیلنجز  کا  جائزہ  لیں  گے  ۔

  تصدیق  /  راستباز  ٹھہرائے  جانے    کے  ترمیم  شُدہ  عقائد

مسیحی  علم  النجات  کو  درپیش  اہم  ترین  چیلنجز  میں  راستباز  ٹھہرائے  جانے    کے  بارے  میں  ترمیم  شُدہ  عقائد  شامل  ہیں  ۔مثال  کے  طور  پر  ،  پہلی  صدی  کی  یہودیت  کی  نئی    تشریح    کی  بنیاد  پر  ، پولُس    کے  بارے  میں    ایک  نیا    نقطہ  نظر    ،تحریک     کے  حامی،  پولُس  کے  نجات  کے  عقیدہ  کو  (  جیسا  کہ  اس  نام  سے  ظاہر  ہے  )  ایک  نئے  انداز  میں  پیش  کرتے    ہیں    ۔مثال  کے  طور  پر  ،  این  ٹی  رائٹ  کے  مطابق  ،”  راستباز  ٹھہرائے    جانے  ”  سے  مُراد  خُدا  کی  طرف  سے  یہ  اعلان  ہے  کہ  یہ  شخص  پہلے  سے  ہی  اُس  کے  لوگوں  میں  شامل  ہے  ۔تاہم  ،  اِس  میں  موجودہ  دَور  میں    اور  مستقبل  میں    راستباز  ٹھہرایا  جانا  ،دونوں  شامل  ہیں  ۔ہمارا    آئندہ    زندگی  میں      راستباز  ٹھہرایا  جانا      ،  عہد  کے  ساتھ  ہماری  وفاداری  پر  مبنی  ہے  ۔

فیڈرل  وژن  کے  حامیوں  نے  بھی  راستباز  ٹھہرائے  جانے  کے  عقیدہ  میں  تبدیلیاں  کر  کے  مسیحی  علم  النجات  کو  چیلنچ  کیا  ہے  ۔اُن  کی  بہت  سی  تعلیمات  کا  سُراغ  نارمن  شیفرڈ  تک  جاتا  ہے  ،  جو  ویسٹ  مِنسٹر  تھیولوجیکل  سیمنری  میں  الٰہیات  کا  پروفیسر  تھا  اور  اُس  نے  ایمان  کو  وفاداری  کے  طور  پر  بیان  کیا  اور  یوں  راستباز  ٹھہرائے  جانے  کی  بنیاد  میں  ہمارے  اعمال  کو  بھی  شامل  کر  دیا  ۔فیڈرل  وژن  کے  حامیوں  نے  اپنے  اپنے  انداز  میں  شیفرڈ  کے  نظریہ  کو  نئی  نظر  کے  عناصر  کے  ساتھ  ملا  دیا  ،  اور  اس  کے  نتیجہ  میں  بائبلی  خوشخبری  کو  کمزور  کر  دیا  ۔شکر  ہے  کہ  تمام  بڑے  بڑے  اِصلاحی  فرقوں  نے  سرکاری  طور  پر  ان  غلط  تعلیمات  کو  رَد  کر  دیا  ہے  ۔

خُدا  کے  بارے  میں  تجدیدی  عقائد

علم  النجات  پر  ،خُدا  کے  بارے  میں  تجدیدی  عقائد  کے  اثرات  اتنے  فوری  طور  پر  ظاہر  نہیں  ہوتے  جتنے  فوری  طور  پر    راستبازی  کےتجدیدی    عقیدہ  میں   ہوتے  ہیں  ،  لیکن  وُہ  بھی  اُتنے  ہی  اہم  ہیں  ۔کیونکہ  ہر  بائبلی  عقیدہ  ،  خُدا  کے  متعلق  عقیدہ  سے  مربُوط  ہے  ۔اِس  لیے  جب  خُدا  کے  متعلق  عقیدہ  میں  ترمیم  کی  جاتی  ہے  تو  ہر  دوسرا  عقیدہ  بھی  مُتاثر  ہوتا  ہے  ۔ایسی  تبدیلیاں  اب  صرف   الٰہیاتی  طور  ہر   آزاد  خیال  (لبرلز)  لوگوں  تک  محدُود  نہیں  رہیں  ۔خُود  کو  اقراالایمان  کے  حامی  کہنے  والے  مسیحی  اور  اصلاحی    علم  الٰہیات  کے  ماہرین  بھی  خُدا  کے  متعلق  عقائد  میں  ترمیم  کرنے  میں  مصروف  ہیں  ۔کچھ  لوگ  خُدا  کو  وقت  کے  بہاوٴ  میں  شریک  کے  طو  ر  پر  پیش  کرتے  ہیں  ،  جو  واقعات  کے  رُونما  ہونے  کے  ساتھ  ساتھ  رَد  عمل  ظاہر  کرتا  اور  اپنے  آپ  کو  حالات  کے  مطابق  ڈھالتا  ہے  ۔اِ  س  نظریہ  کے  مطابق  ،خُدا  کو  صرف  ہماری  سمجھ  بُوجھ    کے  لیے    جواب  دہ  نہیں  دکھایا  گیا  بلکہ  حقیقت  میں  وُہ  حقیقی  تبدیلی  کے  تابع  سمجھا  جاتا  ہے  ۔

مختصر  یہ  کہ خُدا  کو  اُس  کی  مخلوقات  کی  طرح  قابل  ِ  تغیر  قرار  دیا  جاتا  ہے  ۔ایسی  تبدیلی  مسیحی  علم  النجات  کے  لیے  ایک  واضح  چیلنچ/آزمائش    پیدا  کرتی  ہے  ۔  اگر  خُدا  کی  مرضی  بدلنے  والی  چیز  ہے  تو  ہماری  نجات  کے  لیے  اُس  کی  مرضی  بھی  قابل  ِ  تغیر  ہو  گی  ۔پھر  ہمارے  پاس  کوئی  حقیقی  اور  ٹھوس  وجہ    باقی  نہیں  رہتی  جس  پر  ہم  اپنی  اُمید  قائم  کریں  ۔خُدا  نے  وعدہ  کیا  ہے  کہ  وُہ  اُن  سب  کو  جو  مسیح  یسوع  پر  ایمان  لاتے  ہیں  ،  بچائے  گا  ،  لیکن  اگر  خُد  ا  اپنا  اِرادہ  تبدیل  کرتا  ہے   تو  ہم  کیسے  جانیں  گے  کہ  وُہ  اس  وعدہ  کے  بارے  میں  اپنا  ذہن  تبدیل  نہیں  کرے  گا  ؟  ہم  کیسے  یقین  کریں  کہ  اُس  کی  ہمارے  لیے  محبت  تبدیل  نہیں  ہو  گی؟

مسیح  کے  متعلق  تجدیدی  عقائد

جس  طرح  خُدا  کے  متعلق  تجدیدی  عقائد  ہیں  ،  اُسی  طرح  مسیح  یسوع  کے  متعلق  تجدیدی  عقائد  بھی  مسیحی  علم  النجات  کے  لیے  ایک  سنجیدہ  چیلنج  پیش  کرتے  ہیں  ۔ایسی  تبدیلیوں  کے  اثرات  واضح  ہونے  چاہییں  ،  کیونکہ  انجیل  مسیح  یسوع  کی  ذات  اور  اُس  کے  کام  پر  مرکُوز  ہے  (۱  کرنتھیوں  ۱۵:    ۳-۸)۔اگر  ہم  مسیح  یسوع  کی  ذات  کے  متعلق  اپنی  سوچ  کو  تبدیل  کریں  تو  اُس  کے  کام  کے  متعلق  بھی  ہماری  سوچ  لازمی  طو  ر  پر  تبدیل  ہو  گی  ۔

علم  المسیح  کے  متعلق  ،  عہد  حاضر  کی  اہم  تبدیلیوں  میں  سے  ایک  اُس  عقیدہ  میں  ظاہر  ہوتی  ہے  جسے  عام  طور  پر  ”  بیٹے  کی  اَزلی  ماتحتی”  کہا  جاتا  ہے  ۔اِس  نظریہ  کے  مطابق  ،بیٹا  ،  ازَلی  طور  پر  باپ  کے  اِختیار  کے  ماتحت  ہے  ،  اور  نہ  صرف  اپنے  مجسم  ہونے  کی    حالت  میں  بلکہ  اپنی  اَزلی  الٰہی  فطرت  میں  بھی  اُس  کے  تابع  ہے  ۔  یہ  تعلیم  مسیح  کےمتعلق    راسخ    عقیدہ  اور  تثلیث  کے  بائبلی  عقیدہ  کے  لیے  براہِ  راست  چیلنج  پیش  کرتی  ہے۔اگرچہ  اس  کے  حامی  یہ  دعویٰ  کرتے  ہیں  کہ  اُن  کا  عقیدہ    نقایہ    کے  عقیدہ      اور  ایسے  اشخاص  جیسے  اتھناسیوس  کے  ساتھ  تعلق  رکھتا  ہے  ،  لیکن  چوتھی  صدی  کے  تثلیثی  مباحث  کا  گہرا  مطالعہ  ظاہر  کرتا  ہے  کہ  اس  قسم  کے  خیالات  نقایہ  کے  حامی  تثلیثی  علما  کی  تحریروں  میں  نہیں  پائے  جاتے  ،  بلکہ  آریوسیت  کے  حامیوں    اور  نیم  آریوسیوں    کے  دلائل  میں  ملتے  ہیں  -وُہ  گروہ     جو  اس  عقیدہ  نامہ  اور  اس  کے  مقرر  کردہ  راست  عقیدے  کے  مخالف  تھے  ۔

مذہبی  تکثیریت

مذہبی  تکثیریت  کو  یا  تو  تشریحی      طریقہ    کے  مطابق    یا  پھر      حکمی  و اُصولی  طریقہ        کے  مطابق    سمجھا  جا  سکتا  ہے  ۔تشریحی  طریقہ  کے  مطابق      یہ  بات  درست  ہے  کہ  دُنیا  میں  بہت  سے  مختلف  مذاہب  پائے  جاتے  ہیں  جو  خُدا  اور  نجات  کے  بارے  میں  ایک  دوسرے  سے  مختلف  بلکہ  متضاد  تعلیمات  پیش  کرتے  ہیں۔تاہم  ،  بعض  لوگ  تشریحی  طریقہ    سے  تجاوز  کرتے  ہوئے  کرتے  ہوئے  حکمی  و  اُصولی    انداز  اپناتے  ہیں  اور  یہ  دعویٰ  کرتے  ہیں  کہ  تمام  مذاہب  اور  اُن  کے  سب  دعوے  یکساں  طور  پر  درست    ہیں  ۔یہ  اصولی  نقطہ  ِ  نظر  مسیحی  علم  النجات  کے  لیے  ایک  بڑا  چیلنج  ہے  ،  کیونکہ  یہ  براہ  راست  اس  امتیازی  مسیحی    دعویٰ  کی  مخالفت  کرتا  ہے  کہ  نجات  کا  صرف  ایک  ہی  راستہ  ہے  ،  اور  وُہ  خُداوند  یسوع  مسیح  ہے  ۔

آدم  کے  گُناہ  میں  گِرنے  کے  بعد  بہت  سے  جھوٹے  مذاہب  وجود  میں  آئے  ہیں  ۔مسیحیت  اُن  جھوٹے  مذاہب  کا  سامنا  ،  خُداوند  یسوع  مسیح  کے    امتیازی    دعووٴں    کے  ساتھ  کرتی  ہے  ۔مسیحیوں  کو  اپنے  خُداوند  سے  یہ  کہہ  کر  بے  وفائی  نہیں  کرنی  چاہیے  کہ  یہ  تمام  جھوٹے  مذاہب  ایک  ہی  خُد  ا  تک  پہنچنے  کے  مختلف  راستے  ہیں  ۔

آفاقی  نجات  کے  نظریے  کی  تجدید

آفاقی  نجات  سے  مُراد  ہے  کہ  آخر  کار  تما  م  انسان  (  اور  بعض  لوگ  تو  اس  میں  فرشتوں  کو  بھی  شامل  کرتے  ہیں  )  نجات  پائیں  گے  ۔آفاقیت  مختلف  صُورتوں  میں  کلیسیا  کی  تاریخ  کے  دوران  موجود  رہی  ہے  ،  اور  حالیہ  دَور  میں  اس  کی  مقبُولیت  میں  دُوبارہ  اضافہ  ہوا  ہے  ۔اس  کا  حکمی  و  اُصولی  مسیحی  علم  النجات  کے  لیے  جو  چیلنج  ہے  وُہ  واضح  ہے  ،  کیونکہ  آخر  کار  ،  اگر  سب  لوگ  نجات  پائیں  گے  تو  پھر  اِنجیل  کی  مُنادی  کرنے  کی    ضرورت  بہت  حد  تک  کم    ہو  جاتی  ہے  ۔کلام  مقدس  میں  جہنم  کی  حقیقت  ،  اور  بطور  ِ  نجات  دہندہ  مسیح  یسوع  کی  انفرادیت  کے  بارے  میں  تعلیم  اس  قدر      کثرت  سے    موجود  ہے  کہ  ایک  آفاقی  نجات  کی  خوشخبری    پر  یقین  لانا  ممکن  نہیں  ۔یہ  محض  خواہش  پر  مبنی  سوچ  ہے  ۔

یہ مضمون سب سے پہلے لیگنئیر منسٹریز کے بلاگ میں شائع ہو چکا ہے۔