جب ہم مسیحی بنتے ہیں تو ہم بُتوں کو چھوڑ کر زندہ خدا کی خدمت کرنے کی طرف رُجُوع کرتے ہیں(1۔تھسلنیکیوں 9:1) ۔  لیکن یہ اِس جنگ کا اِختتام نہیں ہے۔ ہمیں ہر وقت بُتوں سے دُور رہنے کی کوشش کرنی چاہئے(1۔کرنتھیوں 14:10)۔ اور پوری کوشش کرنی ہے کہ ہم خود بھی اُن سے محفوظ رہیں اور دُوسروں کو بھی اُن سے محفوظ رکھیں (1۔ یوحنا 21:5)۔

اَناجیلِ اَربعہ کا نقطۂ عروج یہ ہے کہ یسوع مسیح ہمارے لئے وہ کام اَنجام دیتا ہے جو ہم اپنے لئے کبھی اَنجام نہیں دے سکتے۔ اَناجیل کا پہلا اور بنیادی مقصد یہ نہیں کہ ہم یسوع مسیح کے کاموں کی نقل کریں، بلکہ جیسا کہ یوحنا نہایت واضح اَلفاظ میں لکھتا ہے، ہم یسوع مسیح پر اِیمان لائیں: ”لیکِن یہ اِس لئے لکھے گئے کہ تُم اِیمان لاؤ کہ یِسُوع ہی خُدا کا بیٹا مسیح ہے اور اِیمان لاکر اُس کے نام سے زِندگی پاؤ“(یوحنا 31:20)۔

مسیحی  ہونے کی حیثیت سے یہ ہماری ذِمےداری ہے کہ ہم اپنے اِس نام کے شایانِ شان زندگی گزاریں، کیوں کہ  ہم شاہی کاہِنوں کا فِرقہ ۔ مُقدّس قَوم اور اَیسی اُمّت ہیں جو خُدا کی خاص مِلکیّت ہے(1۔پطرس 9:2)۔ بپتسمہ کو ایک طرح کا ’’نیا پیدایشی سرٹیفکیٹ‘‘ بھی سمجھا جا سکتا ہے، جو اِس بات کی مضبوط گواہی دیتا ہے کہ ہم خدائے ثالوث کے نام سے مُہر بند کئے گئے ہیں (متی 19:28)۔